dagh jo ab tak ayan hain wo bata kaise miTen

daaġh jo ab tak ayaañ haiñ vo batā kaise miTeñ

fāsle jo darmiyāñ haiñ vo batā kaise miTeñ

ek muddat se diloñ meñ dard kī haiñ bastiyāñ

dard kī jo bastiyāñ haiñ vo batā kaise miTeñ

raat bhar soyā nahīñ maiñ bas isī ik fikr meñ

an-sunī kuchh siskiyāñ haiñ vo batā kaise miTeñ

kis tarah rishtoñ meñ aa.ī talḳhiyāñ ye phir kajī

be-sabab jo talḳhiyāñ haiñ vo batā kaise miTeñ

sham.a kal jaltī rahī hai der tak is soch meñ

kuchh añdhere be-zabāñ haiñ vo batā kaise miTeñ

jo purāne the gunah vo dho diye tū ne magar

ḳhuun ke taaza nishāñ haiñ vo batā kaise miTeñ

maiñ ġhamoñ ke bādaloñ kī baat ab kartā nahīñ

ḳhauf ke jo āsmāñ haiñ vo batā kaise miTeñ

dagh jo ab tak ayan hain wo bata kaise miTen

fasle jo darmiyan hain wo bata kaise miTen

ek muddat se dilon mein dard ki hain bastiyan

dard ki jo bastiyan hain wo bata kaise miTen

raat bhar soya nahin main bas isi ek fikr mein

an-suni kuchh siskiyan hain wo bata kaise miTen

kis tarah rishton mein aai talKHiyan ye phir kaji

be-sabab jo talKHiyan hain wo bata kaise miTen

shama kal jalti rahi hai der tak is soch mein

kuchh andhere be-zaban hain wo bata kaise miTen

jo purane the gunah wo dho diye tu ne magar

KHun ke taza nishan hain wo bata kaise miTen

main ghamon ke baadalon ki baat ab karta nahin

KHauf ke jo aasman hain wo bata kaise miTen