daim ho uske husn ki nuzhat KHuda kare

daa.im ho us ke husn kī nuzhat ḳhudā kare

aur mujh meñ ye junūn kī lazzat ḳhudā kare

sanjīdgī kā rañg ho thoḌā sā pyaar meñ

baaqī magar ho rañg-e-sharārat ḳhudā kare

muddat se koī tiir na ḳhanjar na sañg-o-ḳhisht

dushman ho merā zinda salāmat ḳhudā kare

ġhamgīn huuñ latīfe haiñ phir bhī zabān par

qaa.em rahe ye zauq-e-zarāfat ḳhudā kare

poshīda haiñ gunāhoñ meñ barbādiyoñ ke raaz

nāzil ho dil pe harf-e-nadāmat ḳhudā kare

majme.a kī kaifiyāt kā manzar ajiib thā

baḌhtā rahe ye zor-e-ḳhitābat ḳhudā kare

kahte haiñ apnī auroñ kī sunte nahīñ haiñ log

ho jaa.e kaash shauq-e-samā.at ḳhudā kare

kahte haiñ ahl-e-dīn ki taqvā hī diin hai

vo jaan jaa.eñ kaash iqāmat ḳhudā kare

merī duā yahī hai sharīk-e-safar ke saath

aa jaa.e ham ko husn-e-nizāmat ḳhudā kare

taḳhlīq hai bulandī-e-afkār kī atā

aa.e tire kalām meñ rif.at ḳhudā kare

har shaḳhs kaash siikh le ādāb pyaar ke

dil meñ na ho kisī ke kudūrat ḳhudā kare

'jāved' chhīn saktā hai kyā koī us kā rizq

jis shaḳhs kī hamesha kifālat ḳhudā kare

daim ho us ke husn ki nuzhat KHuda kare

aur mujh mein ye junun ki lazzat KHuda kare

sanjidgi ka rang ho thoDa sa pyar mein

baqi magar ho rang-e-shararat KHuda kare

muddat se koi tir na KHanjar na sang-o-KHisht

dushman ho mera zinda salamat KHuda kare

ghamgin hun latife hain phir bhi zaban par

qaem rahe ye zauq-e-zarafat KHuda kare

poshida hain gunahon mein barbaadiyon ke raaz

nazil ho dil pe harf-e-nadamat KHuda kare

majmea ki kaifiyat ka manzar ajib tha

baDhta rahe ye zor-e-KHitabat KHuda kare

kahte hain apni auron ki sunte nahin hain log

ho jae kash shauq-e-samaat KHuda kare

kahte hain ahl-e-din ki taqwa hi din hai

wo jaan jaen kash iqamat KHuda kare

meri dua yahi hai sharik-e-safar ke sath

aa jae hum ko husn-e-nizamat KHuda kare

taKHliq hai bulandi-e-afkar ki ata

aae tere kalam mein rifat KHuda kare

har shaKHs kash sikh le aadab pyar ke

dil mein na ho kisi ke kudurat KHuda kare

'jawed' chhin sakta hai kya koi us ka rizq

jis shaKHs ki hamesha kifalat KHuda kare