دائمی درد کی کہانی ہے

دائمی درد کی کہانی ہے

کیسی بے درد زندگانی ہے

جب سے شہر صنم سے نکلے ہیں

صرف اور صرف لا مکانی ہے

میں ابھی تک وہی دوانہ ہوں

کیفیت بھی وہی پرانی ہے

کیا نہ حاصل ہوا ہمیں پھر بھی

کیوں یہ احساس رائگانی ہے

عشق ہوتا اگر لہو ہوتا

پر تری آنکھ میں تو پانی ہے

آ کے خوابوں میں لوٹ جاتے ہو

وصل کیسا یہ خوش گمانی ہے

پھر بچھڑنا بھی ہے تمہیں مجھ سے

مجھ کو آواز بھی لگانی ہے

رک بھی جائے تو غم نہیں ہوگا

اب یہ دھڑکن کسے سنانی ہے

کوئی مذہب نہیں ہے خطرے میں

سب سیاست کی لن ترانی ہے

کیا ہے افرنگؔ حیثیت اپنی

بسکہ یاروں کی قدردانی ہے