daimi dard ki kahani hai

dā.imī dard kī kahānī hai

kaisī be-dard zindagānī hai

jab se shahr-e-sanam se nikle haiñ

sirf aur sirf lā-makānī hai

maiñ abhī tak vahī divāna huuñ

kaifiyat bhī vahī purānī hai

kyā na hāsil huā hameñ phir bhī

kyoñ ye ehsās-e-rā.igānī hai

ishq hotā agar lahū hotā

par tirī aañkh meñ to paanī hai

aa ke ḳhvāboñ meñ lauT jaate ho

vasl kaisā ye ḳhush-gumānī hai

phir bichhaḌnā bhī hai tumheñ mujh se

mujh ko āvāz bhī lagānī hai

ruk bhī jaa.e to ġham nahīñ hogā

ab ye dhaḌkan kise sunānī hai

koī maz.hab nahīñ hai ḳhatre meñ

sab siyāsat kī lan-tarānī hai

kyā hai 'afrang' haisiyat apnī

bas-ki yāroñ kī qadrdānī hai

daimi dard ki kahani hai

kaisi be-dard zindagani hai

jab se shahr-e-sanam se nikle hain

sirf aur sirf la-makani hai

main abhi tak wahi diwana hun

kaifiyat bhi wahi purani hai

kya na hasil hua hamein phir bhi

kyon ye ehsas-e-raigani hai

ishq hota agar lahu hota

par teri aankh mein to pani hai

aa ke KHwabon mein lauT jate ho

wasl kaisa ye KHush-gumani hai

phir bichhaDna bhi hai tumhein mujh se

mujh ko aawaz bhi lagani hai

ruk bhi jae to gham nahin hoga

ab ye dhaDkan kise sunani hai

koi mazhab nahin hai KHatre mein

sab siyasat ki lan-tarani hai

kya hai 'afrang' haisiyat apni

bas-ki yaron ki qadrdani hai