Dalta adl ki jholi mein syahi kaise

Dāltā adl kī jholī meñ syāhī kaise

māñgtā mujh se koī jhūTī gavāhī kaise

kyā tire jism pe TuuTī hai qayāmat koī

daf.atan aaj mirī ruuh karāhī kaise

jab har ik dard kī zanjīr ko kaT jaanā hai

phir tirā dard huā lā-matanāhī kaise

kitnā be-Dhañg tanāsub hai mahāz-e-ġham par

itne lashkar se laḌe ek sipāhī kaise

jī rahā huuñ maiñ ġhulāmoñ kā havāla ban kar

merī pahchān bane masnad-e-shāhī kaise

kis havāle se thā mausam kā sitam peḌoñ par

duur tak phail ga.ī zard tabāhī kaise

Dalta adl ki jholi mein syahi kaise

mangta mujh se koi jhuTi gawahi kaise

kya tere jism pe TuTi hai qayamat koi

dafatan aaj meri ruh karahi kaise

jab har ek dard ki zanjir ko kaT jaana hai

phir tera dard hua la-matanahi kaise

kitna be-Dhang tanasub hai mahaz-e-gham par

itne lashkar se laDe ek sipahi kaise

ji raha hun main ghulamon ka hawala ban kar

meri pahchan bane masnad-e-shahi kaise

kis hawale se tha mausam ka sitam peDon par

dur tak phail gai zard tabahi kaise