dam-e-KHushbu mein giraftar saba hai kab se

dām-e-ḳhushbū meñ giraftār sabā hai kab se

lafz iz.hār kī uljhan meñ paḌā hai kab se

ai kaḌī chup ke dar o baam sajāne vaale

muntazir koī sar-e-koh-e-nidā hai kab se

chāñd bhī merī tarah husn-shanāsā niklā

us kī dīvār pe hairān khaḌā hai kab se

baat kartā huuñ to lafzoñ se mahak aatī hai

koī anfās ke parde meñ chhupā hai kab se

shobada-bāzi-e-ā.īna-e-ehsās na pūchh

hairat-e-chashm vahī shoḳh qabā hai kab se

dekhiye ḳhuun kī barsāt kahāñ hotī hai

shahr par chhā.ī huī surḳh ghaTā hai kab se

kor-chashmoñ ke liye ā.īna-ḳhāna mālūm

varna har zarra tirā aks-numā hai kab se

khoj meñ kis kī bharā shahr lagā hai 'amjad'

DhūñDtī kis ko sar-e-dasht havā hai kab se

dam-e-KHushbu mein giraftar saba hai kab se

lafz izhaar ki uljhan mein paDa hai kab se

ai kaDi chup ke dar o baam sajaane wale

muntazir koi sar-e-koh-e-nida hai kab se

chand bhi meri tarah husn-shanasa nikla

us ki diwar pe hairan khaDa hai kab se

baat karta hun to lafzon se mahak aati hai

koi anfas ke parde mein chhupa hai kab se

shobada-bazi-e-aina-e-ehsas na puchh

hairat-e-chashm wahi shoKH qaba hai kab se

dekhiye KHun ki barsat kahan hoti hai

shahr par chhai hui surKH ghaTa hai kab se

kor-chashmon ke liye aaina-KHana malum

warna har zarra tera aks-numa hai kab se

khoj mein kis ki bhara shahr laga hai 'amjad'

DhunDti kis ko sar-e-dasht hawa hai kab se