daman hai mera dasht ka daman dusra

dāman hai merā dasht kā dāmān dūsrā

merī tarah na phāḌe garebān dūsrā

yak-rañg huuñ maiñ us gul-e-ra.anā ke ishq meñ

bulbul na huuñ ki DhūñDūñ gulsitān dūsrā

thā hī ġham-e-firāq milā us meñ dard-e-rashk

muflis ke ghar meñ aayā ye mehmān dūsrā

terī hayā-e-chashm sā dekhā nahīñ raqīb

yaañ ehtiyāj kyā hai nigahbān dūsrā

uryāñ-tanoñ ke sar pe tirī ḳhāk-e-kū rahe

dar-kārvāñ nahīñ sar-o-sāmān dūsrā

kiije zamīr-e-ḳhāk ko aadam kī chhān agar

us shakl kā ban aave na insān dūsrā

jū-ul-baqar rakhe ye shaiḳh-e-shikam-parast

ik ḳhvān khā kahe hai kahāñ ḳhvān dūsrā

sair-e-ajab rakhe hai tirī jalva-gāh-e-nāz

is lutf kā kahāñ hai ḳhyābān dūsrā

naqd-e-dil us ko denā hai 'hasrat' savāb o farz

us zulf sā na hogā pareshān dūsrā

daman hai mera dasht ka daman dusra

meri tarah na phaDe gareban dusra

yak-rang hun main us gul-e-rana ke ishq mein

bulbul na hun ki DhunDun gulsitan dusra

tha hi gham-e-firaq mila us mein dard-e-rashk

muflis ke ghar mein aaya ye mehman dusra

teri haya-e-chashm sa dekha nahin raqib

yan ehtiyaj kya hai nigahban dusra

uryan-tanon ke sar pe teri KHak-e-ku rahe

dar-karwan nahin sar-o-saman dusra

kije zamir-e-KHak ko aadam ki chhan agar

us shakl ka ban aawe na insan dusra

ju-ul-baqar rakhe ye shaiKH-e-shikam-parast

ek KHwan kha kahe hai kahan KHwan dusra

sair-e-ajab rakhe hai teri jalwa-gah-e-naz

is lutf ka kahan hai KHyaban dusra

naqd-e-dil us ko dena hai 'hasrat' sawab o farz

us zulf sa na hoga pareshan dusra