daman ki hawa yaad na zulfon ki ghaTa yaad

dāman kī havā yaad na zulfoñ kī ghaTā yaad

ab kuchh bhī nahīñ soz-e-ġham-e-dil ke sivā yaad

sargarm-e-safar thā na rahā kuchh bhī mujhe yaad

naqsh-e-kaf-e-pā yaad na manzil kā patā yaad

tum aa ga.e jab yaad to kuchh bhī na rahā yaad

kab tum ne bhulāyā mujhe kab tum ne kiyā yaad

ab kuchh bhī nahīñ ek ġham-e-dil ke sivā yaad

phir bhī hai tirī nīm-nigāhī kī adā yaad

vo daur ki ab mujh ko zarā bhī na rahā yaad

yuuñ ālam-e-furqat meñ tujhe maiñ ne kiyā yaad

mad.hosh kiyā jis ne mujhe soz-e-navā se

ab tak hai vahī naġhma-e-be-sāz-o-sadā yaad

allāh re ye be-ḳhudī-e-shauq kā aalam

kūche meñ tire aa ke tirā ghar na rahā yaad

muddat huī ḳhud apnī navā yaad na aa.ī

ehsās ko ab tak hai magar terī sadā yaad

yuuñ sub.h rulāne ke liye kam to nahīñ thī

kyoñ shām-e-judā.ī kā samay aa hī gayā yaad

kuchh tujh ko jafāoñ ke sivā yaad nahīñ hai

lekin nahīñ kuchh mujh ko duāoñ ke sivā yaad

Dartā huuñ ḳhabar gardish-e-daurāñ ko na ho jaa.e

ai dost ye kyoñ aaj mujhe tū ne kiyā yaad

nisyāñ kā 'hayāt' is se ta.alluq nahīñ kuchh bhī

un kī bhī jafā yaad hai apnī bhī vafā yaad

daman ki hawa yaad na zulfon ki ghaTa yaad

ab kuchh bhi nahin soz-e-gham-e-dil ke siwa yaad

sargarm-e-safar tha na raha kuchh bhi mujhe yaad

naqsh-e-kaf-e-pa yaad na manzil ka pata yaad

tum aa gae jab yaad to kuchh bhi na raha yaad

kab tum ne bhulaya mujhe kab tum ne kiya yaad

ab kuchh bhi nahin ek gham-e-dil ke siwa yaad

phir bhi hai teri nim-nigahi ki ada yaad

wo daur ki ab mujh ko zara bhi na raha yaad

yun aalam-e-furqat mein tujhe main ne kiya yaad

madhosh kiya jis ne mujhe soz-e-nawa se

ab tak hai wahi naghma-e-be-saz-o-sada yaad

allah re ye be-KHudi-e-shauq ka aalam

kuche mein tere aa ke tera ghar na raha yaad

muddat hui KHud apni nawa yaad na aai

ehsas ko ab tak hai magar teri sada yaad

yun subh rulane ke liye kam to nahin thi

kyon sham-e-judai ka samay aa hi gaya yaad

kuchh tujh ko jafaon ke siwa yaad nahin hai

lekin nahin kuchh mujh ko duaon ke siwa yaad

Darta hun KHabar gardish-e-dauran ko na ho jae

ai dost ye kyon aaj mujhe tu ne kiya yaad

nisyan ka 'hayat' is se talluq nahin kuchh bhi

un ki bhi jafa yaad hai apni bhi wafa yaad