daman wasi tha to kahe ko chashm tarsa

dāman vasī' thā to kaahe ko chashm tarsā

rahmat ḳhudā kī tujh ko ai abr zor barsā

shāyad kabāb kar kar khāyā kabūtar un ne

naama uḌā phire hai us kī galī meñ par sā

vahshī mizāj az-bas mānūs bādya haiñ

un ke junūñ meñ jangal apnā huā hai ghar sā

jis haath meñ rahā kī us kī kamar hamesha

us haath mārne kā sar par bañdhā hai kar sā

sab pech kī ye bāteñ haiñ shā'iroñ kī varna

bārīk aur nāzuk mū kab hai us kamar sā

tarz-e-nigāh us kī dil le ga.ī sabhoñ ke

kyā momin o brahman kyā gabr aur tarsā

tum vāqif-e-tarīq-e-be-tāqatī nahīñ ho

yaañ rāh-e-do-qadam hai ab duur kā safar sā

kuchh bhī ma'āsh hai ye kī un ne ek chashmak

jab muddatoñ hamārā jī dekhne ko tarsā

Tuk tark-e-'ishq kariye lāġhar bahut hue ham

aadhā nahīñ rahā hai ab jism-e-rañj-farsā

vā'iz ko ye jalan hai shāyad ki farbahī se

rahtā hai hauz hī meñ aksar paḌā magar sā

andāz se hai paidā sab kuchh ḳhabar hai us ko

go 'mīr' be-sar-o-pā zāhir hai be-ḳhabar sā

daman wasi' tha to kahe ko chashm tarsa

rahmat KHuda ki tujh ko ai abr zor barsa

shayad kabab kar kar khaya kabutar un ne

nama uDa phire hai us ki gali mein par sa

wahshi mizaj az-bas manus baadya hain

un ke junun mein jangal apna hua hai ghar sa

jis hath mein raha ki us ki kamar hamesha

us hath marne ka sar par bandha hai kar sa

sab pech ki ye baaten hain sha'iron ki warna

barik aur nazuk mu kab hai us kamar sa

tarz-e-nigah us ki dil le gai sabhon ke

kya momin o brahman kya gabr aur tarsa

tum waqif-e-tariq-e-be-taqati nahin ho

yan rah-e-do-qadam hai ab dur ka safar sa

kuchh bhi ma'ash hai ye ki un ne ek chashmak

jab muddaton hamara ji dekhne ko tarsa

Tuk tark-e-'ishq kariye laghar bahut hue hum

aadha nahin raha hai ab jism-e-ranj-farsa

wa'iz ko ye jalan hai shayad ki farbahi se

rahta hai hauz hi mein aksar paDa magar sa

andaz se hai paida sab kuchh KHabar hai us ko

go 'mir' be-sar-o-pa zahir hai be-KHabar sa