danish-o-fahm ka jo bojh sambhaale nikle

dānish-o-fahm kā jo bojh sambhāle nikle

un ke az.hān pe afkār pe jaale nikle

maiñ ye samjhā ki koī narm zamīñ aa pahūñchī

ġhaur se dekhā to vo paañv ke chhāle nikle

zaḳhm khā kar ye thī ḳhush-fahmī ki mar jā.eñge

dosto ham to baḌe hausle vaale nikle

dil TaTolā shab-e-tanhā.ī to mahsūs huā

ham bhī ai dost tire chāhne vaale nikle

aaj ke daur ke suqrāt pe kyā hogā asar

apnī hī zaat meñ jo zahr ke pyāle nikle

phan ko phailā.e jo ye aaj khaḌe haiñ 'jāved'

āstīñ ke ye mirī apne hī paale nikle

danish-o-fahm ka jo bojh sambhaale nikle

un ke azhan pe afkar pe jale nikle

main ye samjha ki koi narm zamin aa pahunchi

ghaur se dekha to wo panw ke chhaale nikle

zaKHm kha kar ye thi KHush-fahmi ki mar jaenge

dosto hum to baDe hausle wale nikle

dil TaTola shab-e-tanhai to mahsus hua

hum bhi ai dost tere chahne wale nikle

aaj ke daur ke suqraat pe kya hoga asar

apni hi zat mein jo zahr ke pyale nikle

phan ko phailae jo ye aaj khaDe hain 'jawed'

aastin ke ye meri apne hi pale nikle