danishwaron ke bas mein ye radd-e-amal na tha

dānishvaroñ ke bas meñ ye radd-e-amal na thā

maiñ aisī teġh le ke uThā jis meñ phal na thā

kyā dard TuuT TuuT ke barsā hai rāt-bhar

itnā ġhubār to mire chehre pe kal na thā

pathrāv kar rahā hai vo ḳhud apnī zaat par

kyā dil ke mas.ale kā koī aur hal na thā

shāḳheñ ladī huī thiiñ to pathar na thā nasīb

pathar paḌe mile to daraḳhtoñ meñ phal na thā

shab kī havā se haar ga.ī mere dil kī aag

yaḳh-basta shahr meñ koī radd-o-badal na thā

ab ek ek harf se chhantī hai raushnī

tum se mile na the to ye husn-e-ġhazal na thā

ye kah ke sab ne barf meñ dafnā diyā mujhe

kyoñ dūsroñ kī tarah mirā zehn shal na thā

'qaisar' zamīr-e-vaqt ko dekhā kured ke

sadiyāñ rakhī thiiñ dosh pe muTThī meñ pal na thā

danishwaron ke bas mein ye radd-e-amal na tha

main aisi tegh le ke uTha jis mein phal na tha

kya dard TuT TuT ke barsa hai raat-bhar

itna ghubar to mere chehre pe kal na tha

pathraw kar raha hai wo KHud apni zat par

kya dil ke masale ka koi aur hal na tha

shaKHen ladi hui thin to pathar na tha nasib

pathar paDe mile to daraKHton mein phal na tha

shab ki hawa se haar gai mere dil ki aag

yaKH-basta shahr mein koi radd-o-badal na tha

ab ek ek harf se chhanti hai raushni

tum se mile na the to ye husn-e-ghazal na tha

ye kah ke sab ne barf mein dafna diya mujhe

kyon dusron ki tarah mera zehn shal na tha

'qaisar' zamir-e-waqt ko dekha kured ke

sadiyan rakhi thin dosh pe muTThi mein pal na tha