dar pe chaDh ke jo tajdid-e-wafa hoti hai

daar pe chaḌh ke jo tajdīd-e-vafā hotī hai

is shahādat pe to sau jaan fidā hotī hai

jin ko da.ava-e-ḳhirad ho zarā aa kar dekheñ

ishq kī raah bahut hosh-rubā hotī hai

dard meñ Duubī nigāhoñ kī zabāñ hai goyā

aur bātoñ se go ye baat judā hotī hai

husn jab soz-e-mohabbat se jilā paatā hai

kyā tajallī pas-e-fānūs-e-vafā hotī hai

un hasīñ āñkhoñ meñ hai hasrat altāf-o-karam

dil hī jaane ye qayāmat kī adā hotī hai

phuul ke dīda-e-pur-nam kā ye anjām ba-ḳhair

pattiyāñ jhaḌtī haiñ shabnam bhī ḳhafā hotī hai

sub.h tak hāl-e-dil-e-zār pe ro lo 'aḳhtar'

is ghaḌī dard ke māroñ kī davā hotī hai

dar pe chaDh ke jo tajdid-e-wafa hoti hai

is shahadat pe to sau jaan fida hoti hai

jin ko dawa-e-KHirad ho zara aa kar dekhen

ishq ki rah bahut hosh-ruba hoti hai

dard mein Dubi nigahon ki zaban hai goya

aur baaton se go ye baat juda hoti hai

husn jab soz-e-mohabbat se jila pata hai

kya tajalli pas-e-fanus-e-wafa hoti hai

un hasin aankhon mein hai hasrat altaf-o-karam

dil hi jaane ye qayamat ki ada hoti hai

phul ke dida-e-pur-nam ka ye anjam ba-KHair

pattiyan jhaDti hain shabnam bhi KHafa hoti hai

subh tak haal-e-dil-e-zar pe ro lo 'aKHtar'

is ghaDi dard ke maron ki dawa hoti hai