dastan bhi muKHtalif lahja bhi yaron se juda

dāstāñ bhī muḳhtalif lahja bhī yāroñ se judā

pāñchvāñ darvesh to hai pahle chāroñ se judā

zahr nā-puḳhta mizājoñ meñ bharā karte haiñ ye

aap rahiyegā zarā in hoshyāroñ se judā

shor barpā ho gayā har gosha-e-gulzār meñ

jab ubhar aayā nayā manzar bahāroñ se judā

chaaT jaatī hirs kī dīmak faqīroñ ke bhī tan

sīrateñ un kī thiiñ lekin shahryāroñ se judā

bas ġham-e-jānāñ nahīñ lekin ġham-e-duniyā to hai

aap kaise ho ga.e phir dil-figāroñ se judā

'nāsir' o 'bānī' sā tujh ko bhī sarāhā jā.egā

jab tirā rañg-e-suḳhan hogā hazāroñ se judā

dastan bhi muKHtalif lahja bhi yaron se juda

panchwan darwesh to hai pahle chaaron se juda

zahr na-puKHta mizajon mein bhara karte hain ye

aap rahiyega zara in hoshyaron se juda

shor barpa ho gaya har gosha-e-gulzar mein

jab ubhar aaya naya manzar bahaaron se juda

chaT jati hirs ki dimak faqiron ke bhi tan

siraten un ki thin lekin shahryaron se juda

bas gham-e-jaanan nahin lekin gham-e-duniya to hai

aap kaise ho gae phir dil-figaron se juda

'nasir' o 'bani' sa tujh ko bhi saraha jaega

jab tera rang-e-suKHan hoga hazaron se juda