dastan-e-gham-e-dil aam na ho jae kahin

dāstān-e-ġham-e-dil aam na ho jaa.e kahīñ

merī ḳhātir koī badnām na ho jaa.e kahīñ

vo bahut sāda-o-māsūm haiñ un kī jānib

iltifāt-e-ġham-o-ālām na ho jaa.e kahīñ

talḳhiyāñ ghol na de bāda-e-hastī meñ koī

zindagī zahr bharā jaam na ho jaa.e kahīñ

rāh-e-ulfat meñ qadam rakh to diyā hai lekin

ham-safar gardish-e-ayyām na ho jaa.e kahīñ

terī rusvā.ī ke Dar se na bharī aah kabhī

lab pe aate hī tirā naam na ho jaa.e kahīñ

koī aañsū na sunā de unheñ afsāna-e-dil

ḳhāmushī morid-e-ilzām na ho jaa.e kahīñ

dil kī dhaḌkan hī mujhe terī ḳhabar detī hai

ḳhatm ye nāma-o-paiġhām na ho jaa.e kahīñ

zindagī dard-e-mohabbat se ibārat hai 'tufail'

dil ko is dard se ārām na ho jaa.e kahīñ

dastan-e-gham-e-dil aam na ho jae kahin

meri KHatir koi badnam na ho jae kahin

wo bahut sada-o-masum hain un ki jaanib

iltifat-e-gham-o-alam na ho jae kahin

talKHiyan ghol na de baada-e-hasti mein koi

zindagi zahr bhara jam na ho jae kahin

rah-e-ulfat mein qadam rakh to diya hai lekin

ham-safar gardish-e-ayyam na ho jae kahin

teri ruswai ke Dar se na bhari aah kabhi

lab pe aate hi tera nam na ho jae kahin

koi aansu na suna de unhen afsana-e-dil

KHamushi morid-e-ilzam na ho jae kahin

dil ki dhaDkan hi mujhe teri KHabar deti hai

KHatm ye nama-o-paigham na ho jae kahin

zindagi dard-e-mohabbat se ibarat hai 'tufail'

dil ko is dard se aaram na ho jae kahin