داستان غم دل عام نہ ہو جائے کہیں

داستان غم دل عام نہ ہو جائے کہیں

میری خاطر کوئی بدنام نہ ہو جائے کہیں

وہ بہت سادہ و معصوم ہیں ان کی جانب

التفات غم و آلام نہ ہو جائے کہیں

تلخیاں گھول نہ دے بادۂ ہستی میں کوئی

زندگی زہر بھرا جام نہ ہو جائے کہیں

راہ الفت میں قدم رکھ تو دیا ہے لیکن

ہم سفر گردش ایام نہ ہو جائے کہیں

تیری رسوائی کے ڈر سے نہ بھری آہ کبھی

لب پہ آتے ہی ترا نام نہ ہو جائے کہیں

کوئی آنسو نہ سنا دے انہیں افسانۂ دل

خامشی مورد الزام نہ ہو جائے کہیں

دل کی دھڑکن ہی مجھے تیری خبر دیتی ہے

ختم یہ نامہ و پیغام نہ ہو جائے کہیں

زندگی درد محبت سے عبارت ہے طفیلؔ

دل کو اس درد سے آرام نہ ہو جائے کہیں