dawa hai aazmaiye chahe jahan mujhe

da.avā hai āzmā.iye chāhe jahāñ mujhe

huuñ bā-vafā qubūl hai har imtihāñ mujhe

farsūda ahl-e-ishq ke afsāne ho ga.e

likhnī hai tarz-e-nau se mirī dāstāñ mujhe

zāhid ne zikr-e-ḳhuld meñ kī thī nishāñ-dahī

mālūm mai-kada thā na kū-e-butāñ mujhe

har rahguzar pe chhoḌe haiñ kuchh aise naqsh-e-pā

ki DhūñDhtā rahegā har ik kārvāñ mujhe

us manzil-e-hayāt meñ hai ab junūñ mirā

ḳhvāhish hai suud kī na to ḳhauf-e-ziyāñ mujhe

un kī jafā pe koī unheñ Toktā nahīñ

talqīn-e-sabr kartā hai saarā jahāñ mujhe

'raunaq' zamāna kuchh bhī kahe is kā ġham nahīñ

vo bad-gumāñ haiñ mujh se nahiñ ye gumāñ mujhe

dawa hai aazmaiye chahe jahan mujhe

hun ba-wafa qubul hai har imtihan mujhe

farsuda ahl-e-ishq ke afsane ho gae

likhni hai tarz-e-nau se meri dastan mujhe

zahid ne zikr-e-KHuld mein ki thi nishan-dahi

malum mai-kada tha na ku-e-butan mujhe

har rahguzar pe chhoDe hain kuchh aise naqsh-e-pa

ki DhunDhta rahega har ek karwan mujhe

us manzil-e-hayat mein hai ab junun mera

KHwahish hai sud ki na to KHauf-e-ziyan mujhe

un ki jafa pe koi unhen Tokta nahin

talqin-e-sabr karta hai sara jahan mujhe

'raunaq' zamana kuchh bhi kahe is ka gham nahin

wo bad-guman hain mujh se nahin ye guman mujhe