daba jo rakh ki tah mein sharar na KHatm hua

dabā jo raakh kī tah meñ sharar na ḳhatm huā

bhaḌak uThegā dabāv agar na ḳhatm huā

laraz rahe haiñ musāfir ke rauñgTe ab tak

panāh-gah meñ bhī luTne kā Dar na ḳhatm huā

mileñ jo raah meñ dekheñ na aañkh bhar kar ham

ghaTā hai rabt magar is qadar na ḳhatm huā

rachā huā hai tajassus kā sam fazāoñ meñ

ajab fasāna thā anjām par na ḳhatm huā

har ek samt se phuuT aa.ī haiñ na.ī shāḳheñ

tane ke kaTne se nām-e-shajar na ḳhatm huā

uThā ke dost mujhe chal diye haiñ kāñdhoñ par

hayāt ḳhatm huī par safar na ḳhatm huā

fasīl-e-jabr meñ dekhe usī ke sapne 'jān'

kisī bhī haal meñ zauq-e-nazar na ḳhatm huā

daba jo rakh ki tah mein sharar na KHatm hua

bhaDak uThega dabaw agar na KHatm hua

laraz rahe hain musafir ke raungTe ab tak

panah-gah mein bhi luTne ka Dar na KHatm hua

milen jo rah mein dekhen na aankh bhar kar hum

ghaTa hai rabt magar is qadar na KHatm hua

racha hua hai tajassus ka sam fazaon mein

ajab fasana tha anjam par na KHatm hua

har ek samt se phuT aai hain nai shaKHen

tane ke kaTne se nam-e-shajar na KHatm hua

uTha ke dost mujhe chal diye hain kandhon par

hayat KHatm hui par safar na KHatm hua

fasil-e-jabr mein dekhe usi ke sapne 'jaan'

kisi bhi haal mein zauq-e-nazar na KHatm hua