dabaya sar to kaha dard mere sar mein nahin

dabāyā sar to kahā dard mere sar meñ nahīñ

kamar dabā.ī to bole miyāñ kamar meñ nahīñ

jo tere uploñ meñ bū hai nahīñ vo ambar meñ

jo ThūTiyoñ meñ tirī bū hai vo agar meñ nahīñ

adū ke vaar kī maiñ fikr kyoñ karūñ yaaro

vo rok hai mire juute meñ jo sipar meñ nahīñ

tumhārī fārsī bilkul nahīñ samajhtā maiñ

chalo palang pe tum maiñ agar magar meñ nahīñ

hamāre paas kahāñ zar TaTolte kyā ho

sivā.e zor ke ab kuchh mirī kamar meñ nahīñ

qadīm hī se mirā nafs sīdhā-sāda hai

sivā.e ḳhair ke ab tak kisī ke shar meñ nahīñ

koī nazīr dikhāo mujhe koī qānūn

jo kāTte ho mirā sir ye circular meñ nahīñ

lañgoT tak bhī mirā le ga.e vo añgiyā ko

luTā huuñ aisā ki koī luTā ġhadar meñ nahīñ

hazāroñ bose diye jaate ho raqīboñ ko

hamāre vāste koī nazar-guzar meñ nahīñ

maiñ apne khūñTe ke bal kūdtā huuñ ai mun.im

jo zor hai mire baazū meñ tere zar meñ nahīñ

bachā ke vaar adū ke lagā.ūñgā farsā

nahīñ hai ḳhauf mujhe teġh gar kamar meñ nahīñ

kisī kā zard hai muñh aur kisī kā kaalā hai

tumhāre misl jafā charḳh-e-nīl-gar meñ nahīñ

sikhā diyā hai ye darbāñ ko us parī-rū ne

'ināyat' aa.e to kah de huzūr ghar meñ nahīñ

dabaya sar to kaha dard mere sar mein nahin

kamar dabai to bole miyan kamar mein nahin

jo tere uplon mein bu hai nahin wo ambar mein

jo ThuTiyon mein teri bu hai wo agar mein nahin

adu ke war ki main fikr kyon karun yaro

wo rok hai mere jute mein jo sipar mein nahin

tumhaari farsi bilkul nahin samajhta main

chalo palang pe tum main agar magar mein nahin

hamare pas kahan zar TaTolte kya ho

siwae zor ke ab kuchh meri kamar mein nahin

qadim hi se mera nafs sidha-sada hai

siwae KHair ke ab tak kisi ke shar mein nahin

koi nazir dikhao mujhe koi qanun

jo kaTte ho mera sir ye circular mein nahin

langoT tak bhi mera le gae wo angiya ko

luTa hun aisa ki koi luTa ghadar mein nahin

hazaron bose diye jate ho raqibon ko

hamare waste koi nazar-guzar mein nahin

main apne khunTe ke bal kudta hun ai munim

jo zor hai mere bazu mein tere zar mein nahin

bacha ke war adu ke lagaunga farsa

nahin hai KHauf mujhe tegh gar kamar mein nahin

kisi ka zard hai munh aur kisi ka kala hai

tumhaare misl jafa charKH-e-nil-gar mein nahin

sikha diya hai ye darban ko us pari-ru ne

'inayat' aae to kah de huzur ghar mein nahin