dabi aawaz mein karti thi kal shikwe zamin mujhse

dabī āvāz meñ kartī thī kal shikve zamīñ mujh se

ki zulm o jaur kā ye bojh uTh saktā nahīñ mujh se

agar ye kashmakash baaqī rahī jahl o tamaddun kī

zamāna chhīn legā daulat-e-ilm-o-yaqīñ mujh se

tumhīñ se kyā chhupānā hai tumhārī hī to bāteñ haiñ

jo kahtī hai tamannā kī nigāh-e-vāpsīñ mujh se

nigāheñ chaar hote hī bhalā kyā hashr uTh jaatā

yaqīnan is se pahle bhī mile haiñ vo kahīñ mujh se

dikhā dī maiñ ne vo manzil jo in donoñ ke aage hai

pareshāñ haiñ ki āḳhir ab kaheñ kyā kufr o diiñ mujh se

ye maanā zarra-e-āvāra-e-dasht-e-vafā huuñ maiñ

nibhānā hī paḌegā tujh ko duniyā-e-hasīñ mujh se

sar-e-manzil pahuñch kar aaj ye mahsūs hotā hai

ki lākhoñ laġhzisheñ har gaam par hotī rahīñ mujh se

udhar saarī tamannāoñ kā markaz āstāñ un kā

idhar barham tamannā par mirī sarkash jabīñ mujh se

dabi aawaz mein karti thi kal shikwe zamin mujh se

ki zulm o jaur ka ye bojh uTh sakta nahin mujh se

agar ye kashmakash baqi rahi jahl o tamaddun ki

zamana chhin lega daulat-e-ilm-o-yaqin mujh se

tumhin se kya chhupana hai tumhaari hi to baaten hain

jo kahti hai tamanna ki nigah-e-wapsin mujh se

nigahen chaar hote hi bhala kya hashr uTh jata

yaqinan is se pahle bhi mile hain wo kahin mujh se

dikha di main ne wo manzil jo in donon ke aage hai

pareshan hain ki aaKHir ab kahen kya kufr o din mujh se

ye mana zarra-e-awara-e-dasht-e-wafa hun main

nibhana hi paDega tujh ko duniya-e-hasin mujh se

sar-e-manzil pahunch kar aaj ye mahsus hota hai

ki lakhon laghzishen har gam par hoti rahin mujh se

udhar sari tamannaon ka markaz aastan un ka

idhar barham tamanna par meri sarkash jabin mujh se