دفعتاً گھٹا کی آڑ سے چاندنی کشید ہو گئی

دفعتاً گھٹا کی آڑ سے چاندنی کشید ہو گئی

زلف اس کے چہرے سے ہٹی اور میری عید ہو گئی

روز روز ملنا آپ سے ہے خطا مگر میں کیا کروں

یہ خطا بہت حسین تھی اس لئے مزید ہو گئی

جب سے تم نے مجھ فقیر پر کی ہے التفات کی نظر

یوں ہوا کہ شخصیت مری خود مری مرید ہو گئی

میرؔ کے تخیلات کا شہد جب سے فکر میں گھلا

اور بھی شعور آ گیا شاعری جدید ہو گئی

تھی فضا وفا کی خوشگوار اپنے دور اقتدار میں

مٹ گیا وفاؤں کا نشاں اب جفا شدید ہو گئی

اے نظامیؔ کائنات میں کربلا سے لے کے آج تک

جب کہیں حسینیت بڑھی تو فضا یزید ہو گئی