dafatan ho gai gul sham-e-wafa tere baad

daf.atan ho ga.ī gul sham-e-vafā tere baad

ḳhāna-e-dil meñ ujālā na huā tere baad

mausam-e-josh-e-junūñ meñ huā pāmāl chaman

le uḌī ḳhushbū-e-gul bād-e-sabā tere baad

jām-e-mai shola-e-javvāla nazar aatā hai

aag barsātī hai sāvan kī ghaTā tere baad

bātinī karb-o-aziyyat maiñ batā.ūñ kis ko

koī hamrāz mujhe mil na sakā tere ba.ad

jab bhī suljhāna hoñ pechīda masā.il mujh ko

chūmtā huuñ tire naqsh-e-kaf-e-pā tere baad

dil meñ rah rah ke mire roz chubhā kartī hai

ḳhaar ban ke tirī har tarz-e-adā tere baad

maut dar-asl hai tamhīd-e-hayāt-e-dā.im

rāz-e-hastī yahī 'sāhil' pe khulā tere baad

dafatan ho gai gul sham-e-wafa tere baad

KHana-e-dil mein ujala na hua tere baad

mausam-e-josh-e-junun mein hua pamal chaman

le uDi KHushbu-e-gul baad-e-saba tere baad

jam-e-mai shola-e-jawwala nazar aata hai

aag barsati hai sawan ki ghaTa tere baad

baatini karb-o-aziyyat main bataun kis ko

koi hamraaz mujhe mil na saka tere baad

jab bhi suljhana hon pechida masail mujh ko

chumta hun tere naqsh-e-kaf-e-pa tere baad

dil mein rah rah ke mere roz chubha karti hai

KHar ban ke teri har tarz-e-ada tere baad

maut dar-asl hai tamhid-e-hayat-e-daim

raaz-e-hasti yahi 'sahil' pe khula tere baad