Dagmagata laDkhaData jhumta jata hun main

Dagmagātā laḌkhaḌātā jhūmtā jaatā huuñ maiñ

tujh tak ai bāb-e-fanā siine ke bal aatā huuñ maiñ

shahr kī bārīkiyoñ meñ phañs gayā huuñ is tarah

chain kī ik saañs kī mohlat nahīñ paatā huuñ maiñ

jab bhī registānoñ meñ jaane kā hotā ittifāq

ghuTne ghuTne zaat kī partoñ meñ dhañs jaatā huuñ maiñ

chal ke bāġh-e-seb meñ aurāq-e-jamshedī paḌhūñ

apnī kaifiyyat se ḳhud ko be-ḳhabar paatā huuñ maiñ

goshe goshe meñ farozāñ ātish-e-lab-hā-e-surḳh

is shafaq meñ dam-ba-dam āñkhoñ ko nahlātā huuñ maiñ

aah vo āñkheñ ki jin ke gird hai uudā ġhubār

gah kuñ.eñ meñ Dūbtā huuñ gah ubhar aatā huuñ maiñ

Dagmagata laDkhaData jhumta jata hun main

tujh tak ai bab-e-fana sine ke bal aata hun main

shahr ki barikiyon mein phans gaya hun is tarah

chain ki ek sans ki mohlat nahin pata hun main

jab bhi registanon mein jaane ka hota ittifaq

ghuTne ghuTne zat ki parton mein dhans jata hun main

chal ke bagh-e-seb mein auraq-e-jamshedi paDhun

apni kaifiyyat se KHud ko be-KHabar pata hun main

goshe goshe mein farozan aatish-e-lab-ha-e-surKH

is shafaq mein dam-ba-dam aankhon ko nahlata hun main

aah wo aankhen ki jin ke gird hai uda ghubar

gah kunen mein Dubta hun gah ubhar aata hun main