دہر میں کوئی کام کرتا جا

دہر میں کوئی کام کرتا جا

اپنا دنیا میں نام کرتا جا

تیری مٹی ملے گی مٹی میں

خاک کا احترام کرتا جا

آفرینش پہ میری بولی اجل

تو بھی دو دن قیام کرتا جا

جستجو اس کی کر تو یاد اس کی

عمر یوں ہی تمام کرتا جا

طور پر گفتگو ہو موسیٰ سے

ہم سے بھی کچھ کلام کرتا جا

تو حصار فلک سے جلد نکل

اور بھی تیز گام کرتا جا

زندگی تجھ کو ہے اگر درکار

موت کا نوش جام کرتا جا

خاکساری عجیب نعمت ہے

اس سے عالم کو رام کرتا جا

صورت مہر آب و تاب کے ساتھ

صبح کی اپنی شام کرتا جا

چشم حق میں رہیں ترے جلوے

اپنا دیدار عام کرتا جا

مسکن خلد کے لئے اے صبرؔ

کچھ نہ کچھ انتظام کرتا جا