dahr mein koi kaam karta ja

dahr meñ koī kaam kartā jā

apnā duniyā meñ naam kartā jā

terī miTTī milegī miTTī meñ

ḳhaak kā ehtirām kartā jā

āfrīnash pe merī bolī ajal

tū bhī do din qiyām kartā jā

justujū us kī kar tū yaad us kī

umr yūñhī tamām kartā jā

tuur par guftugū ho muusā se

ham se bhī kuchh kalām kartā jā

tū hisār-e-falak se jald nikal

aur bhī tez-gām kartā jā

zindagī tujh ko hai agar darkār

maut kā nosh jaam kartā jā

ḳhāksārī ajiib ne.amat hai

is se aalam ko raam kartā jā

sūrat-e-mehr āb-o-tāb ke saath

sub.h kī apnī shaam kartā jā

chashm-e-haq meñ raheñ tire jalve

apnā dīdār aam kartā jā

maskan-e-ḳhuld ke liye ai 'sabr'

kuchh na kuchh intizām kartā jā

dahr mein koi kaam karta ja

apna duniya mein nam karta ja

teri miTTi milegi miTTi mein

KHak ka ehtiram karta ja

aafrinash pe meri boli ajal

tu bhi do din qiyam karta ja

justuju us ki kar tu yaad us ki

umr yunhi tamam karta ja

tur par guftugu ho musa se

hum se bhi kuchh kalam karta ja

tu hisar-e-falak se jald nikal

aur bhi tez-gam karta ja

zindagi tujh ko hai agar darkar

maut ka nosh jam karta ja

KHaksari ajib neamat hai

is se aalam ko ram karta ja

surat-e-mehr aab-o-tab ke sath

subh ki apni sham karta ja

chashm-e-haq mein rahen tere jalwe

apna didar aam karta ja

maskan-e-KHuld ke liye ai 'sabr'

kuchh na kuchh intizam karta ja