دہشت کی اک چٹان ہے دل پر دھری ہوئی

دہشت کی اک چٹان ہے دل پر دھری ہوئی

آئینہ بلبلایا کہ تیشہ زنی ہوئی

سپنوں میں کوئی سایۂ دیوار بھی نہیں

دھوپوں کے بستروں سے ہے نیندیں اڑی ہوئی

خاموش وقت کے یہی تیور رہے کہ بس

باد سموم باد صبا میں گھلی ہوئی

ٹپکی نہ اک شعاع بھی روزن سے صبح کے

شب بھر تو تیرگی کی تھی ندی چڑھی ہوئی

یوں دھڑکنوں سے رنگ تمنا بچھڑ گیا

جیسے شجر سے شاخ ثمر ہے کٹی ہوئی

شاخ طلب سے گرتے ہی برگ امید کو

دوش ہوا پہ نسبت آوارگی ہوئی