دیر میں ہم آ کھڑے ہیں اک صنم کے واسطے

دیر میں ہم آ کھڑے ہیں اک صنم کے واسطے

پاؤں اٹھیں کس طرح طوف حرم کے واسطے

عیش و عشرت اے خدا اوروں کے دم کے واسطے

اور ہمیں پیدا کیا رنج و الم کے واسطے

جتنے ہیں جور و جفا سب میرے دم کے واسطے

خوبرو پیدا ہوئے جور و ستم کے واسطے

سو رہے ہیں خفتگان خاک کس آرام سے

سچ تو یہ ہے چین ہے اہل عدم کے واسطے

مرتے دم دیدار ان کا دیکھ لوں وہ آئے ہیں

قابض ارواح تھم جا ایک دم کے واسطے

بحر عالم میں اٹھا کر سر یہ کہتا ہے حباب

ساری دنیا کی بقا ہے ایک دم کے واسطے

بالوں میں آئی سفیدی دانت سب ہلنے لگے

ہوتی ہیں تیاریاں ملک عدم کے واسطے

بعد مردن شعلۂ داغ جگر کی روشنی

شکل مشعل ہے ہمیں راہ عدم کے واسطے

رزق قسمت میں لکھا ہے جس قدر وہ پائیں گے

فکر کرتے کس لئے ہم بیش و کم کے واسطے

بحر عالم میں جو دیکھی زندگی شکل حباب

گھر بنایا خاک میں پھر ایک دم کے واسطے

ہم کسی صورت نہیں اٹھنے کے کوئے یار سے

زاہدا تو جان دے باغ ارم کے واسطے

آنکھیں پتھرائی ہوئی ہیں دم نکلتا ہی نہیں

جان جاں صورت دکھا دو ایک دم کے واسطے

آستان بت پہ جس کو مل گئی جائے قیام

وہ کبھی جاتا نہیں طوف حرم کے واسطے

کام ہے رحمت کا تیری پردہ پوشی اے خدا

ہم سراپا جرم ہیں تو ہے کرم کے واسطے

دیتے گر کاندھا شہید ناز کے لاشے کو تم

پاؤں سے مہندی نہ چھٹتی دو قدم کے واسطے

میان سے باہر نکل اے خنجر قاتل ذرا

راہبر درکار ہے راہ عدم کے واسطے

اے وفاؔ رنج و غم و اندوہ و فریاد و فغاں

سب کیے پیدا خدا نے میرے دم کے واسطے