dair mein hum aa khaDe hain ek sanam ke waste

dair meñ ham aa khaḌe haiñ ik sanam ke vāste

paañv uTheñ kis tarah tauf-e-haram ke vāste

aish-o-ishrat ai ḳhudā auroñ ke dam ke vāste

aur hameñ paidā kiyā ranj-o-alam ke vāste

jitne haiñ jaur-o-jafā sab mere dam ke vāste

ḳhūb-rū paidā hue jaur-o-sitam ke vāste

so rahe haiñ ḳhuftagān-e-ḳhāk kis ārām se

sach to ye hai chain hai ahl-e-adam ke vāste

marte dam dīdār un kā dekh luuñ vo aa.e haiñ

qābiz-e-arvāh tham jā ek dam ke vāste

bahr-e-ālam meñ uThā kar sar ye kahtā hai habāb

saarī duniyā kī baqā hai ek dam ke vāste

bāloñ meñ aa.ī safedī daañt sab hilne lage

hotī haiñ tayyāriyāñ mulk-e-adam ke vāste

ba.ad murdan sho.ala-e-dāġh-e-jigar kī raushnī

shakl-e-mash.al hai hameñ rāh-e-adam ke vāste

rizq qismat meñ likhā hai jis qadar vo pā.eñge

fikr karte kis liye ham besh-o-kam ke vāste

bahr-e-ālam meñ jo dekhī zindagī shakl-e-habāb

ghar banāyā ḳhaak meñ phir ek dam ke vāste

ham kisī sūrat nahīñ uThne ke kū-e-yār se

zāhidā tū jaan de bāġh-e-iram ke vāste

āñkheñ pathrā.ī huī haiñ dam nikaltā hī nahīñ

jān-e-jāñ sūrat dikhā do ek dam ke vāste

āstān-e-but pe jis ko mil ga.ī jā-e-qayām

vo kabhī jaatā nahīñ tauf-e-haram ke vāste

kaam hai rahmat kā terī parda-poshī ai ḳhudā

ham sarāpā jurm haiñ tū hai karam ke vāste

dete gar kāñdhā shahīd-e-nāz ke lāshe ko tum

paañv se mehñdī na chhuTtī do qadam ke vāste

myaan se bāhar nikal ai ḳhanjar-e-qātil zarā

rāhbar darkār hai rāh-e-adam ke vāste

ai 'vafā' ranj-o-ġham-o-andoh-o-fariyād-o-fuġhāñ

sab kiye paidā ḳhudā ne mere dam ke vāste

dair mein hum aa khaDe hain ek sanam ke waste

panw uThen kis tarah tauf-e-haram ke waste

aish-o-ishrat ai KHuda auron ke dam ke waste

aur hamein paida kiya ranj-o-alam ke waste

jitne hain jaur-o-jafa sab mere dam ke waste

KHub-ru paida hue jaur-o-sitam ke waste

so rahe hain KHuftagan-e-KHak kis aaram se

sach to ye hai chain hai ahl-e-adam ke waste

marte dam didar un ka dekh lun wo aae hain

qabiz-e-arwah tham ja ek dam ke waste

bahr-e-alam mein uTha kar sar ye kahta hai habab

sari duniya ki baqa hai ek dam ke waste

baalon mein aai safedi dant sab hilne lage

hoti hain tayyariyan mulk-e-adam ke waste

baad murdan shoala-e-dagh-e-jigar ki raushni

shakl-e-mashal hai hamein rah-e-adam ke waste

rizq qismat mein likha hai jis qadar wo paenge

fikr karte kis liye hum besh-o-kam ke waste

bahr-e-alam mein jo dekhi zindagi shakl-e-habab

ghar banaya KHak mein phir ek dam ke waste

hum kisi surat nahin uThne ke ku-e-yar se

zahida tu jaan de bagh-e-iram ke waste

aankhen pathrai hui hain dam nikalta hi nahin

jaan-e-jaan surat dikha do ek dam ke waste

aastan-e-but pe jis ko mil gai ja-e-qayam

wo kabhi jata nahin tauf-e-haram ke waste

kaam hai rahmat ka teri parda-poshi ai KHuda

hum sarapa jurm hain tu hai karam ke waste

dete gar kandha shahid-e-naz ke lashe ko tum

panw se mehndi na chhuTti do qadam ke waste

myan se bahar nikal ai KHanjar-e-qatil zara

rahbar darkar hai rah-e-adam ke waste

ai 'wafa' ranj-o-gham-o-andoh-o-fariyaad-o-fughan

sab kiye paida KHuda ne mere dam ke waste