dair-o-haram mein dasht-o-bayaban-o-bagh mein

dair-o-haram meñ dasht-o-bayābān-o-bāġh meñ

DhūñDo na mujh ko maiñ huuñ ḳhud apne surāġh meñ

haañ ai asīro ḳhair se ho kis surāġh meñ

khilte haiñ ab to phuul havā-bast baaġh meñ

is barf-zār meñ bhī jalātī hī jaatī hai

vo ik shabīh jo hai nihāñ dil ke daaġh meñ

rahtā hai ab zamīn pe vo āsmāñ-pasand

haañ vo ḳhajil thā jis se ḳhudā bhī dimāġh meñ

mumkin nahīñ ki ġhaar meñ dil ke utar sake

māñge kī raushnī hai tumhāre charāġh meñ

kyā qadr vo kareñge kisī ḳhush-navā kī 'hosh'

tafrīq kar sakeñ jo na qumrī-o-zāġh meñ

dair-o-haram mein dasht-o-bayaban-o-bagh mein

DhunDo na mujh ko main hun KHud apne suragh mein

han ai asiro KHair se ho kis suragh mein

khilte hain ab to phul hawa-bast bagh mein

is barf-zar mein bhi jalati hi jati hai

wo ek shabih jo hai nihan dil ke dagh mein

rahta hai ab zamin pe wo aasman-pasand

han wo KHajil tha jis se KHuda bhi dimagh mein

mumkin nahin ki ghaar mein dil ke utar sake

mange ki raushni hai tumhaare charagh mein

kya qadr wo karenge kisi KHush-nawa ki 'hosh'

tafriq kar saken jo na qumri-o-zagh mein