dair-o-haram se kaam na ku-e-butan se hai

dair-o-haram se kaam na kū-e-butāñ se hai

vābasta zindagī tire dard-e-nihāñ se hai

āġhāz-e-dard-e-ishq na pūchho kahāñ se hai

ye baat māvarā ġham-e-sharh-o-bayāñ se hai

kitne maze se ahl-e-fanā kī guzar ga.ī

jo qaid hai ta.ayyun nām-o-nishāñ se hai

kab se huuñ ġham-nasīb-e-mohabbat na pūchhiye

ye dekhiye ki silsila-e-ġham kahāñ se hai

vāqif mizāj-e-gul se na rañg-e-bahār se

kahne ko to lagāv gul-o-gulsitāñ se hai

duniyā hai ḳhud fareb umiid is se kyā rakheñ

kuchh aas hai to sirf tire āstāñ se hai

jo āshnā ho jalva-e-sad-rang se tire

kyā kaam us ko farq bahār-o-ḳhizāñ se hai

gulchīñ qafas bahār ḳhizāñ barq āñdhiyāñ

kitnoñ kā naam ek mere gulistāñ se hai

jis par haqīqat safar-e-zindagī khulī

vo kārvāñ meñ rah ke alag kārvāñ se hai

so āshiyāñ chaman meñ raheñ to rahā kareñ

jo iḳhtilāf hai vo mire āshiyāñ se hai

rūdād-e-zindagī bhī hai apnī ajiib 'shauq'

har shaḳhs bad-gumān mirī dāstāñ se hai

dair-o-haram se kaam na ku-e-butan se hai

wabasta zindagi tere dard-e-nihan se hai

aaghaz-e-dard-e-ishq na puchho kahan se hai

ye baat mawara gham-e-sharh-o-bayan se hai

kitne maze se ahl-e-fana ki guzar gai

jo qaid hai tayyun nam-o-nishan se hai

kab se hun gham-nasib-e-mohabbat na puchhiye

ye dekhiye ki silsila-e-gham kahan se hai

waqif mizaj-e-gul se na rang-e-bahaar se

kahne ko to lagaw gul-o-gulsitan se hai

duniya hai KHud fareb umid is se kya rakhen

kuchh aas hai to sirf tere aastan se hai

jo aashna ho jalwa-e-sad-rang se tere

kya kaam us ko farq bahaar-o-KHizan se hai

gulchin qafas bahaar KHizan barq aandhiyan

kitnon ka nam ek mere gulistan se hai

jis par haqiqat safar-e-zindagi khuli

wo karwan mein rah ke alag karwan se hai

so aashiyan chaman mein rahen to raha karen

jo iKHtilaf hai wo mere aashiyan se hai

rudad-e-zindagi bhi hai apni ajib 'shauq'

har shaKHs bad-guman meri dastan se hai