dalil-e-kun hai magar dard-e-la-dawa nikli

dalīl-e-kun hai magar dard-e-lā-davā niklī

ye kā.enāt ajab hairat-āzmā niklī

ye maanā sach hai koī ġham sadā nahīñ rahtā

ḳhushī milī thī to vo bhī gurez-pā niklī

havā kī tarah se uḌ jā.ūñgā jahāñ bhī rahūñ

pa.e ḳhabar qafas-e-rañg se sadā niklī

kahāñ se aa.ī havā is ujaaḌ manzar meñ

jo ghar se niklī to vo bhī shikasta-pā niklī

vo nīm-shab vo ruḳh-e-māhtāb-o-abr-e-siyah

shikastagī thī ki chashm-e-falak-numā niklī

vo mauj-e-mai thī jo chamkā ga.ī udāsī ko

kisī kī ḳhanda-labī bu-e-āshnā niklī

hayā ke saath taqāzā-e-qahr-o-mahar bhī hai

tirī nazar se tabī.at mirī judā niklī

dalil-e-kun hai magar dard-e-la-dawa nikli

ye kaenat ajab hairat-azma nikli

ye mana sach hai koi gham sada nahin rahta

KHushi mili thi to wo bhi gurez-pa nikli

hawa ki tarah se uD jaunga jahan bhi rahun

pae KHabar qafas-e-rang se sada nikli

kahan se aai hawa is ujaD manzar mein

jo ghar se nikli to wo bhi shikasta-pa nikli

wo nim-shab wo ruKH-e-mahtab-o-abr-e-siyah

shikastagi thi ki chashm-e-falak-numa nikli

wo mauj-e-mai thi jo chamka gai udasi ko

kisi ki KHanda-labi bu-e-ashna nikli

haya ke sath taqaza-e-qahr-o-mahar bhi hai

teri nazar se tabiat meri juda nikli