دلیل صبح زریں ہے تو عظمت کا نشاں ہو جا

دلیل صبح زریں ہے تو عظمت کا نشاں ہو جا

ترا منشور ایسا ہو کہ تو سیمیں گماں ہو جا

کف سہرۂ ہستی سے خمار صوفیا لے کر

انا الحق بھی پکارے جا چراغ لا مکاں ہو جا

دکھا دے جوہری عنصر کہ ہو دشمن خمیدہ سر

خودی کا راز داں ہو کر چمن کا پاسباں ہو جا

نصیحت گر خرد آمیز اساس ملک مستحکم

بہار انجمن دست عطا سر نہاں ہو جا

وسیع الفکر ہو کر تو کلاہ قیصری پا لے

متاع سروری دے کر فقیر بے نشاں ہو جا

سرور زندگانی نے شب کلفت زدہ بخشی

دقیقہ سنج تو تدبیر سے آتش فشاں ہو جا

نگہبان وطن اے بندۂ مومن گہر افشاں

شگاف سینہ اعدا کا تو باعث یہاں ہو جا

دلیل قاطع باطل تری شمشیر ہو انجمؔ

عدوئے فاسق و فاجر عزیز بے کساں ہو جا