دم بہ دم سینۂ ہستی میں سناں ٹوٹتی ہے

دم بہ دم سینۂ ہستی میں سناں ٹوٹتی ہے

دیکھنا یہ ہے کہ اب سانس کہاں ٹوٹتی ہے

اک محبت کہ بچا رکھی تھی دل میں کب سے

وہ صراحی بھی مرے تشنہ دہاں ٹوٹتی ہے

ڈھونڈ ہی لے گی افق پار فلک زاد کی آنکھ

اک سیہ غار جہاں کاہکشاں ٹوٹتی ہے

نغمہ ساماں عجب انداز سے ہے ساز اجل

سر سمٹتے ہیں جہاں تان وہاں ٹوٹتی ہے

آخری تیر چلانا ہے خود اپنی جانب

لیکن اس بار ارادوں کی کماں ٹوٹتی ہے

دور اک یاد کے ساحل پہ ہے وہ ماہ تمام

فاصلہ اتنا کہ بس آس جہاں ٹوٹتی ہے