dam-ba-dam taghayyur ke rang hain zamane mein

dam-ba-dam taġhayyur ke rañg haiñ zamāne meñ

kuchh kamī nahīñ aatī dard ke ḳhazāne meñ

ġhair kī shikāyat kyā shauq-e-lazzat-e-ġham se

maiñ bhī ho gayā shāmil apnā dil dukhāne meñ

mere chaar jānib the ḳhār-zār nafrat ke

umr kaT ga.ī merī rāsta banāne meñ

vaqt ne un āñkhoñ ke ḳhvāb hī badal Daale

der ho ga.ī tujh ko mere paas aane meñ

chīḳhte the ham-sā.e ik ajiib lazzat thī

dhuup meñ khaḌe ho kar aa.ina dikhāne meñ

tā.eroñ ko aisī bhī kyā thī ujlat-e-parvāz

bhuul kar chale aa.e ḳhvāb āshiyāne meñ

thī havā bhī shorīda haath bhī the larzīda

uñgliyāñ jalā Dālīñ ik diyā jalāne meñ

daam aur qafas Thahre qissa-hā-e-pārīna

qaid kar diyā us ne mujh ko āb-o-dāne meñ

bām-o-dar 'farāsat' ab kyā hameñ ḳhushī deñge

zindagī basar kar dī ġham ke shāmiyāne meñ

dam-ba-dam taghayyur ke rang hain zamane mein

kuchh kami nahin aati dard ke KHazane mein

ghair ki shikayat kya shauq-e-lazzat-e-gham se

main bhi ho gaya shamil apna dil dukhane mein

mere chaar jaanib the KHar-zar nafrat ke

umr kaT gai meri rasta banane mein

waqt ne un aankhon ke KHwab hi badal Dale

der ho gai tujh ko mere pas aane mein

chiKHte the ham-sae ek ajib lazzat thi

dhup mein khaDe ho kar aaina dikhane mein

taeron ko aisi bhi kya thi ujlat-e-parwaz

bhul kar chale aae KHwab aashiyane mein

thi hawa bhi shorida hath bhi the larzida

ungliyan jala Dalin ek diya jalane mein

dam aur qafas Thahre qissa-ha-e-parina

qaid kar diya us ne mujh ko aab-o-dane mein

baam-o-dar 'farasat' ab kya hamein KHushi denge

zindagi basar kar di gham ke shamiyane mein