dam bhar bhi jo ho jae mulaqat bahut hai

dam bhar bhī jo ho jaa.e mulāqāt bahut hai

do bāteñ bhī vo kar leñ to ye baat bahut hai

lutf āj-kal aatā hai sivā bāda-kashī kā

matbū mujhe is liye barsāt bahut hai

din bhar to judā.ī meñ taḌapte hue guzrā

jaate ho kahāñ Thahro abhī raat bahut hai

kyoñ bul-havasoñ meñ vo mujhe ginte haiñ yā-rab

ishq aur havas meñ to munāfāt bahut hai

do ghūñT bhī hai ġham ke ġhalat karne ko kaafī

thoḌī sī bhī saaqī kī mudārāt bahut hai

ai dil unheñ Dar hai kahīñ badnām na ho jaa.eñ

ye chorī chhupe kī bhī mulāqāt bahut hai

nāseh tirī bak-bak se to sar phir gayā apnā

mohmal ye bahut hai ye ḳharābāt bahut hai

raushan hue chaudah tabaq ik jaam se tere

ehsān terā pīr-e-ḳharābāt bahut hai

dil le ke mirā jī vo baḌhāte haiñ ye kah kar

ho dil se to thoḌī sī bhī sauġhāt bahut hai

mujh mast ko kyā saltanat-e-jam kī tamanna

ḳhidmat tirī ai pīr-e-ḳharābāt bahut hai

rahtā hai 'ḳhayāl' aap kā har-vaqt sanā-ḳhvāñ

īmān kī hai baat ḳhush-auqāt bahut hai

dam bhar bhi jo ho jae mulaqat bahut hai

do baaten bhi wo kar len to ye baat bahut hai

lutf aaj-kal aata hai siwa baada-kashi ka

matbu mujhe is liye barsat bahut hai

din bhar to judai mein taDapte hue guzra

jate ho kahan Thahro abhi raat bahut hai

kyon bul-hawason mein wo mujhe ginte hain ya-rab

ishq aur hawas mein to munafat bahut hai

do ghunT bhi hai gham ke ghalat karne ko kafi

thoDi si bhi saqi ki mudaraat bahut hai

ai dil unhen Dar hai kahin badnam na ho jaen

ye chori chhupe ki bhi mulaqat bahut hai

naseh teri bak-bak se to sar phir gaya apna

mohmal ye bahut hai ye KHarabaat bahut hai

raushan hue chaudah tabaq ek jam se tere

ehsan tera pir-e-KHarabaat bahut hai

dil le ke mera ji wo baDhate hain ye kah kar

ho dil se to thoDi si bhi saughat bahut hai

mujh mast ko kya saltanat-e-jam ki tamanna

KHidmat teri ai pir-e-KHarabaat bahut hai

rahta hai 'KHayal' aap ka har-waqt sana-KHwan

iman ki hai baat KHush-auqat bahut hai