dam-bhar jo na dekhe tujhe ai rashk-e-pari aankh

dam-bhar jo na dekhe tujhe ai rashk-e-parī aañkh

mizhgāñ kī zabānoñ se kare nauhagarī aañkh

jam jaa.e tasavvur jo tire buuTe se qad kā

pathrā ke bane saaf aqīq-e-shajarī aañkh

le lījiye shīshe haiñ safed ashk nahīñ haiñ

nam bāda-kashī se ki ga.ī shīsha-garī aañkh

jaao jo chaman ko to kare farsh-e-rah-e-nāz

bulbul jigar-o-fāḳhta dil kabk-e-darī aañkh

dekhā jise bismil kiyā taakā jise maarā

us aañkh se Dariye jo ḳhudā se na Darī aañkh

jumbish udhar us ko hai to gardish idhar is ko

abrū hai ki shamshīr sipar hai ki phirī aañkh

kyā diid ke qābil tire kūche kī zamīñ hai

har gaam hai naqsh-e-qadam-e-rah-guzrī aañkh

tum jhāñk rahe ho ye tumheñ taak rahā hai

kyuuñ dīda-e-rauzan pe ajī tum ne dharī aañkh

kahtī hī tirī nāf-o-shikam dekh ke bulbul

ruḳhsār-e-gul-e-tar pe hai nargis kī dharī aañkh

ai maah ye sab chashm-e-falak ke haiñ ishāre

aise to na thī mā.il-e-be-dād-garī aañkh

nargis jo gulistāñ meñ hai to dasht meñ aahū

har rañg meñ dikhlāne lagī jalvagarī aañkh

gad kā kahīñ vo surma kā dumbāla uThā.e

hai dast-e-mizha meñ liye putlī kī phirī aañkh

dekhe vo agar chashm-e-siyah aur ye ḳhat-e-sabz

nargis kī siyah aañkh ho tuutī kī harī aañkh

dam-bhar jo na dekhe tujhe ai rashk-e-pari aankh

mizhgan ki zabanon se kare nauhagari aankh

jam jae tasawwur jo tere buTe se qad ka

pathra ke bane saf aqiq-e-shajari aankh

le lijiye shishe hain safed ashk nahin hain

nam baada-kashi se ki gai shisha-gari aankh

jao jo chaman ko to kare farsh-e-rah-e-naz

bulbul jigar-o-faKHta dil kabk-e-dari aankh

dekha jise bismil kiya taka jise mara

us aankh se Dariye jo KHuda se na Dari aankh

jumbish udhar us ko hai to gardish idhar is ko

abru hai ki shamshir sipar hai ki phiri aankh

kya did ke qabil tere kuche ki zamin hai

har gam hai naqsh-e-qadam-e-rah-guzri aankh

tum jhank rahe ho ye tumhein tak raha hai

kyun dida-e-rauzan pe aji tum ne dhari aankh

kahti hi teri naf-o-shikam dekh ke bulbul

ruKHsar-e-gul-e-tar pe hai nargis ki dhari aankh

ai mah ye sab chashm-e-falak ke hain ishaare

aise to na thi mail-e-be-dad-gari aankh

nargis jo gulistan mein hai to dasht mein aahu

har rang mein dikhlane lagi jalwagari aankh

gad ka kahin wo surma ka dumbaala uThae

hai dast-e-mizha mein liye putli ki phiri aankh

dekhe wo agar chashm-e-siyah aur ye KHat-e-sabz

nargis ki siyah aankh ho tuti ki hari aankh