دم بھر کو بند نالۂ بلبل نہ ہو سکا

دم بھر کو بند نالۂ بلبل نہ ہو سکا

لیکن اثر سے زرد رخ گل نہ ہو سکا

وقت اخیر رو ہی دئے مجھ کو دیکھ کر

وہ حال تھا کہ ان سے تحمل نہ ہو سکا

پوشیدہ ہر شرر میں ہے برق جمال حق

دم بھر کو جزو سے تو جدا کل نہ ہو سکا

اخفائے راز غم کا جو زنداں میں تھا خیال

زنجیر بھی ہلائی مگر غل نہ ہو سکا

داغ جگر میں کیا ہے کمال فروغ عشق

ایسا جلا چراغ کہ پھر گل نہ ہو سکا

سینے پہ سانپ لوٹ نہ جائے شب فراق

اس وہم میں تصور کاکل نہ ہو سکا

مجبوریاں کچھ ایسی تھیں بسملؔ شب فراق

مجھ سے چراغ زیست بھی تو گل نہ ہو سکا