dam bhar ko band nala-e-bulbul na ho saka

dam bhar ko band nāla-e-bulbul na ho sakā

lekin asar se zard ruḳh-e-gul na ho sakā

vaqt-e-aḳhīr ro hī diye mujh ko dekh kar

vo haal thā ki un se tahammul na ho sakā

poshīda har sharar meñ hai barq-e-jamāl-e-haq

dam bhar ko juzv se to judā kul na ho sakā

iḳhfā-e-rāz-e-ġham kā jo zindāñ meñ thā ḳhayāl

zanjīr bhī hilā.ī magar ġhul na ho sakā

dāġh-e-jigar meñ kyā hai kamāl-e-faroġh-e-'ishq

aisā jalā charāġh ki phir gul na ho sakā

siine pe saañp loT na jaa.e shab-e-firāq

is vahm meñ tasavvur-e-kākul na ho sakā

majbūriyāñ kuchh aisī thiiñ 'bismil' shab-e-firāq

mujh se charāġh-e-zīst bhī to gul na ho sakā

dam bhar ko band nala-e-bulbul na ho saka

lekin asar se zard ruKH-e-gul na ho saka

waqt-e-aKHir ro hi diye mujh ko dekh kar

wo haal tha ki un se tahammul na ho saka

poshida har sharar mein hai barq-e-jamal-e-haq

dam bhar ko juzw se to juda kul na ho saka

iKHfa-e-raaz-e-gham ka jo zindan mein tha KHayal

zanjir bhi hilai magar ghul na ho saka

dagh-e-jigar mein kya hai kamal-e-farogh-e-'ishq

aisa jala charagh ki phir gul na ho saka

sine pe sanp loT na jae shab-e-firaq

is wahm mein tasawwur-e-kakul na ho saka

majburiyan kuchh aisi thin 'bismil' shab-e-firaq

mujh se charagh-e-zist bhi to gul na ho saka