dam-e-nim-shab kul faza so rahi hai

dam-e-nīm-shab kul fazā so rahī hai

ḳhirāmāñ ḳhirāmāñ havā so rahī hai

shikasta sitāroñ ko niiñd aa rahī hai

hazīñ TimTimātī ziyā so rahī hai

mukammal ḳhamoshī hai har raqs-gah meñ

lab-e-chañg-o-nai par navā so rahī hai

zamīñ se falak tak falak se zamīñ tak

ba-rang-e-taḳhayyul duā so rahī hai

na jaane kahāñ ishq sustā rahā hai

kahāñ zindagī kī adā so rahī hai

koī ruup dil meñ mire so rahā hai

kañval meñ qamar kī ziyā so rahī hai

ḳhudā ke liye tū bhī ab so jā 'az.har'

sivā tere ḳhalq-e-ḳhudā so rahī hai

dam-e-nim-shab kul faza so rahi hai

KHiraman KHiraman hawa so rahi hai

shikasta sitaron ko nind aa rahi hai

hazin TimTimati ziya so rahi hai

mukammal KHamoshi hai har raqs-gah mein

lab-e-chang-o-nai par nawa so rahi hai

zamin se falak tak falak se zamin tak

ba-rang-e-taKHayyul dua so rahi hai

na jaane kahan ishq susta raha hai

kahan zindagi ki ada so rahi hai

koi rup dil mein mere so raha hai

kanwal mein qamar ki ziya so rahi hai

KHuda ke liye tu bhi ab so ja 'azhar'

siwa tere KHalq-e-KHuda so rahi hai