دم نیم شب کل فضا سو رہی ہے

دم نیم شب کل فضا سو رہی ہے

خراماں خراماں ہوا سو رہی ہے

شکستہ ستاروں کو نیند آ رہی ہے

حزیں ٹمٹماتی ضیا سو رہی ہے

مکمل خموشی ہے ہر رقص گہ میں

لب چنگ و نے پر نوا سو رہی ہے

زمیں سے فلک تک فلک سے زمیں تک

برنگ تخیل دعا سو رہی ہے

نہ جانے کہاں عشق سستا رہا ہے

کہاں زندگی کی ادا سو رہی ہے

کوئی روپ دل میں مرے سو رہا ہے

کنول میں قمر کی ضیا سو رہی ہے

خدا کے لئے تو بھی اب سو جا اظہرؔ

سوا تیرے خلق خدا سو رہی ہے