dam-e-subh pi li sar-e-sham pi li

dam-e-sub.h pī lī sar-e-shām pī lī

agar mil ga.ī ek do jaam pī lī

na āġhāz sochā na anjām pī lī

rakhā ham ne piine se bas kaam pī lī

maiñ ai shaiḳh insān hī to huuñ āḳhir

ghaTāoñ ne phailā diye daam pī lī

zamāne kī be-rahm gardish ke hāthoñ

na paayā jahāñ meñ jo ārām pī lī

kabhī ham ne sāġhar pe sāġhar luñDhā.e

kabhī ham ne durd-e-tah-e-jām pī lī

tirī rahmatoñ ke bharose pe ham ne

ka.ī baar le kar tirā naam pī lī

mai-e-lāla-gūñ ke piyāle meñ ham ne

jo dekhā ruḳh-e-māh-e-gulfām pī lī

ḳhudā se na jhijhke to duniyā kā Dar kyā

jo piine pe aa.e sar-e-ām pī lī

kisī shoḳh kī mast āñkhoñ ne 'sā.ib'

diyā bāda-noshī kā paiġhām pī lī

dam-e-subh pi li sar-e-sham pi li

agar mil gai ek do jam pi li

na aaghaz socha na anjam pi li

rakha hum ne pine se bas kaam pi li

main ai shaiKH insan hi to hun aaKHir

ghaTaon ne phaila diye dam pi li

zamane ki be-rahm gardish ke hathon

na paya jahan mein jo aaram pi li

kabhi hum ne saghar pe saghar lunDhae

kabhi hum ne durd-e-tah-e-jam pi li

teri rahmaton ke bharose pe hum ne

kai bar le kar tera nam pi li

mai-e-lala-gun ke piyale mein hum ne

jo dekha ruKH-e-mah-e-gulfam pi li

KHuda se na jhijhke to duniya ka Dar kya

jo pine pe aae sar-e-am pi li

kisi shoKH ki mast aankhon ne 'saib'

diya baada-noshi ka paigham pi li