dam junun ki had-e-intiha pe Thahra hai

dam junūñ kī had-e-intihā pe Thahrā hai

ye merā dil hai abhī ibtidā pe Thahrā hai

usī ke lams se āb-o-havā badaltī hai

tamām manzar-e-jāñ ik adā pe Thahrā hai

kanār-e-kun se pare hai kahīñ vajūd apnā

ye kārvāñ to ġhubār-e-sadā pe Thahrā hai

kuchh aur der numā.ish hai shor-o-shar kī yahāñ

ye ik habāb hai mauj-e-fanā pe Thahrā hai

shuā-e-sub.h bun-e-gosh meñ utartī hai

zavāl-e-mehr ki dast-e-hinā pe Thahrā hai

shab-e-siyāh sar-e-ḳhāl meñ simaTtī hai

sitāra TuuT ke band-e-qabā pe Thahrā hai

nafas nafas meñ bhaḌaktī hai dil kī lau 'sarmad'

ajab charāġh hai ye bām-e-hū pe Thahrā hai

dam junun ki had-e-intiha pe Thahra hai

ye mera dil hai abhi ibtida pe Thahra hai

usi ke lams se aab-o-hawa badalti hai

tamam manzar-e-jaan ek ada pe Thahra hai

kanar-e-kun se pare hai kahin wajud apna

ye karwan to ghubar-e-sada pe Thahra hai

kuchh aur der numaish hai shor-o-shar ki yahan

ye ek habab hai mauj-e-fana pe Thahra hai

shua-e-subh bun-e-gosh mein utarti hai

zawal-e-mehr ki dast-e-hina pe Thahra hai

shab-e-siyah sar-e-KHal mein simaTti hai

sitara TuT ke band-e-qaba pe Thahra hai

nafas nafas mein bhaDakti hai dil ki lau 'sarmad'

ajab charagh hai ye baam-e-hu pe Thahra hai