dam sadh ke dekhun tujhe jhapkun na palak bhi

dam saadh ke dekhūñ tujhe jhapkūñ na palak bhī

āñkhoñ meñ samo luuñ tire lahje kī damak bhī

ai ishq agar mujh ko tirā izn ho mumkin

āġhosh meñ le luuñ tire paikar kī mahak bhī

ai zikr mire fikr kī taqdīr badal de

ai nuur mire nutq ke kaase meñ jhalak bhī

ai qatra-e-ḳhūñ mus.haf-e-ruḳhsār pe til bin

ai satr-e-tapāñ kāġhaz-e-sāda pe dahak bhī

dil arz-e-hunar hai to badan arz-e-hunar hai

ai mere dil-e-sāda mire tan meñ dhaḌak bhī

ye rañg mire nuur meñ rakkhe haiñ usī ne

guñdhvā.ī thī jis ne mirī miTTī kī mahak bhī

us shahr kī jānib mire paañv nahīñ uThte

is dil se vahī duur karegā ye jhijak bhī

kyā maiñ ne kiyā hai ki sazā-vār-e-ridāñ huuñ

mujh ko to bahut hai tirī kamlī kī jhalak bhī

dam sadh ke dekhun tujhe jhapkun na palak bhi

aankhon mein samo lun tere lahje ki damak bhi

ai ishq agar mujh ko tera izn ho mumkin

aaghosh mein le lun tere paikar ki mahak bhi

ai zikr mere fikr ki taqdir badal de

ai nur mere nutq ke kase mein jhalak bhi

ai qatra-e-KHun mushaf-e-ruKHsar pe til bin

ai satr-e-tapan kaghaz-e-sada pe dahak bhi

dil arz-e-hunar hai to badan arz-e-hunar hai

ai mere dil-e-sada mere tan mein dhaDak bhi

ye rang mere nur mein rakkhe hain usi ne

gundhwai thi jis ne meri miTTi ki mahak bhi

us shahr ki jaanib mere panw nahin uThte

is dil se wahi dur karega ye jhijak bhi

kya main ne kiya hai ki saza-war-e-ridan hun

mujh ko to bahut hai teri kamli ki jhalak bhi