damakta hai sar-e-nok-e-sinan koi sitara

damaktā hai sar-e-nok-e-sināñ koī sitāra

hamārā ham-nafas yā ham-zabāñ koī sitāra

hamārī hijratoñ kā ḳhātma mumkin nahīñ hai

hamāre saath hai be-ḳhānumāñ koī sitāra

faqat āñkheñ charāġhoñ kī tarah se jal rahī haiñ

kisī kī dastaras meñ hai kahāñ koī sitāra

ham apnī khoj meñ jis markaze ko jā rahe haiñ

abhī pahuñchā na ho shāyad vahāñ koī sitāra

hamāre har taraf jo raat ne khīñchā huā hai

usī ik dā.ere meñ hai ravāñ koī sitāra

ajab kyā mash.aleñ le kar hamārā muntazir ho

pas-e-dīvār-e-shab girya-kunāñ koī sitāra

kisī kī chashm-e-tar se be-muhāba jhāñktā hai

samundar kī tarah se be-karāñ koī sitāra

jahāñ zor-e-havā kashtī ulaTnā chāhtā hai

vahīñ thāme hue hai bādbāñ koī sitāra

vo raqs-e-marg hai lamhoñ kī nabzeñ TūTtī haiñ

magar is raqs meñ hai ḳhush-gumāñ koī sitāra

zamīñ to paañv se 'at.har' nikaltī jā rahī hai

sañbhāle ab zamām-e-āsmāñ koī sitāra

damakta hai sar-e-nok-e-sinan koi sitara

hamara ham-nafas ya ham-zaban koi sitara

hamari hijraton ka KHatma mumkin nahin hai

hamare sath hai be-KHanuman koi sitara

faqat aankhen charaghon ki tarah se jal rahi hain

kisi ki dastaras mein hai kahan koi sitara

hum apni khoj mein jis markaze ko ja rahe hain

abhi pahuncha na ho shayad wahan koi sitara

hamare har taraf jo raat ne khincha hua hai

usi ek daere mein hai rawan koi sitara

ajab kya mashalen le kar hamara muntazir ho

pas-e-diwar-e-shab girya-kunan koi sitara

kisi ki chashm-e-tar se be-muhaba jhankta hai

samundar ki tarah se be-karan koi sitara

jahan zor-e-hawa kashti ulaTna chahta hai

wahin thame hue hai baadban koi sitara

wo raqs-e-marg hai lamhon ki nabzen TuTti hain

magar is raqs mein hai KHush-guman koi sitara

zamin to panw se 'athar' nikalti ja rahi hai

sanbhaale ab zamam-e-asman koi sitara