dar-ba-dar bhaTka main uski aarzu ke waste

dar-ba-dar bhaTkā maiñ us kī aarzū ke vāste

hasrateñ bhī ham-safar thiiñ justujū ke vāste

vo nigāhoñ meñ samāyā sabz mausam kī tarah

muntazir thā dasht-e-dil bhī rang-o-bū ke vāste

sho.ala-ruḳh kī tund-ḳhūī umr bhar sahnī paḌī

kī tamanna maiñ ne jo us ḳhūb-rū ke vāste

luT chukā sab kuchh junūñ meñ us vafā ke naam par

daaġh hai poshīda jis kī aabrū ke vāste

maut ke raahī haiñ ham raḳht-e-safar kuchh bhī nahīñ

gum hue haiñ hast meñ jām-o-subū ke vāste

ho lahū se tar libās-e-dil to 'sālim' kyā ilaaj

kyā karūñ zaḳhm-e-tamannā ke rafū ke vāste

dar-ba-dar bhaTka main us ki aarzu ke waste

hasraten bhi ham-safar thin justuju ke waste

wo nigahon mein samaya sabz mausam ki tarah

muntazir tha dasht-e-dil bhi rang-o-bu ke waste

shoala-ruKH ki tund-KHui umr bhar sahni paDi

ki tamanna main ne jo us KHub-ru ke waste

luT chuka sab kuchh junun mein us wafa ke nam par

dagh hai poshida jis ki aabru ke waste

maut ke rahi hain hum raKHt-e-safar kuchh bhi nahin

gum hue hain hast mein jam-o-subu ke waste

ho lahu se tar libas-e-dil to 'salim' kya ilaj

kya karun zaKHm-e-tamanna ke rafu ke waste