dar-ba-dar phirta hun par un ko nahin pata hun main

dar-ba-dar phirtā huuñ par un ko nahīñ paatā huuñ maiñ

ek shīsha hai ki har patthar se Takrātā huuñ maiñ

tāq-e-nisyāñ ho ga.iiñ ab zindagī kī shoḳhiyāñ

kah nahīñ saktā magar sab kuchh kahe jaatā huuñ maiñ

kārvān-e-zindagī ruk ruk ke kyoñ chalne lagā

chal nahīñ saktā magar phir bhī chalā jaatā huuñ maiñ

munfarid hai ye ġhazal aur tarah kā misrā bhī hai

koī kātib likhtā jaa.e jo bhī likhvātā huuñ maiñ

aag kā dariyā hai aur ye Duub kar jaanā bhī hai

tairtā jaatā huuñ jitnā Dūbtā jaatā huuñ maiñ

zindagī meñ 'shād' kī hai shādmānī kā samāñ

har qadam har moḌ par ik zindagī paatā huuñ maiñ

dar-ba-dar phirta hun par un ko nahin pata hun main

ek shisha hai ki har patthar se Takraata hun main

taq-e-nisyan ho gain ab zindagi ki shoKHiyan

kah nahin sakta magar sab kuchh kahe jata hun main

karwan-e-zindagi ruk ruk ke kyon chalne laga

chal nahin sakta magar phir bhi chala jata hun main

munfarid hai ye ghazal aur tarah ka misra bhi hai

koi katib likhta jae jo bhi likhwata hun main

aag ka dariya hai aur ye Dub kar jaana bhi hai

tairta jata hun jitna Dubta jata hun main

zindagi mein 'shad' ki hai shadmani ka saman

har qadam har moD par ek zindagi pata hun main