dar-e-faqir pe jo aae wo dua le jae

dar-e-faqīr pe jo aa.e vo duā le jaa.e

davā-e-dard koī dard-e-lā-davā le jaa.e

visāl-e-yār kī ab sirf ek sūrat hai

hamārī ḳhaak uḌā kar vahāñ havā le jaa.e

to jaan jaa.e mirā dukh jo tere pahlū se

koī bhī aa.e tire dost ko uThā le jaa.e

kisī jazīra-e-nādīda kī talab thī hameñ

ab is pe hai ki jahāñ ham ko nāḳhudā le jaa.e

zamāna-sāz hai 'fartāsh' us ke kyā kahne

ki ḳhud hī qatl kare aur ḳhūñ-bahā le jaa.e

dar-e-faqir pe jo aae wo dua le jae

dawa-e-dard koi dard-e-la-dawa le jae

visal-e-yar ki ab sirf ek surat hai

hamari KHak uDa kar wahan hawa le jae

to jaan jae mera dukh jo tere pahlu se

koi bhi aae tere dost ko uTha le jae

kisi jazira-e-nadida ki talab thi hamein

ab is pe hai ki jahan hum ko naKHuda le jae

zamana-saz hai 'fartash' us ke kya kahne

ki KHud hi qatl kare aur KHun-baha le jae