dar-e-mai-kada hai khula hua sar-e-charKH aaj ghaTa bhi hai

dar-e-mai-kada hai khulā huā sar-e-charḳh aaj ghaTā bhī hai

chale daur-e-sāqī-e-dilrubā ki chaman meñ raqs-e-sabā bhī hai

ġham-e-zindagī sahī jāñ-gusil magar is se koī bachā bhī hai

yahī ġham hai rāz-e-nashāt-e-dil yahī zindagī kā mazā bhī hai

yahī zaḳhm-e-dil jo nasīb hai yahī soz-e-dil kā naqīb hai

ye mire ḳhulūs kā rañg hai kisī nāznīñ kī atā bhī hai

hai mirī nigāh meñ sirf tū kisī aur kī nahīñ justujū

tire iltifāt kī aarzū tirī be-ruḳhī kā gilā bhī hai

mujhe kyā uḌā.eñge bāl-o-par ki qafas meñ umr huī basar

maiñ rihā huā bhī kabhī agar to rihā.ī merī sazā bhī hai

mirī dāstāñ bhī ajiib hai ye kisī kisī kā nasīb hai

kahīñ zikr-e-bād-e-sumūm hai kahīñ zikr-e-mauj-e-sabā bhī hai

na tū uzv-e-jāh pe faḳhr kar ki ye zindagī to hai ik safar

tujhe kyā ḳhabar are be-ḳhabar dabe paañv pīchhe qazā bhī hai

jo bahār fasl-e-shabāb thī vo misāl-e-abr guzar ga.ī

nahīñ zindagī meñ koī ḳhushī ki ḳhilāf mere havā bhī hai

vo ba-zo.am-e-husn haiñ ḳhud-nigar to mujhe bhī naaz hai ishq par

maiñ niyāz-mand sahī magar mujhe 'soz' pās-e-anā bhī hai

dar-e-mai-kada hai khula hua sar-e-charKH aaj ghaTa bhi hai

chale daur-e-saqi-e-dilruba ki chaman mein raqs-e-saba bhi hai

gham-e-zindagi sahi jaan-gusil magar is se koi bacha bhi hai

yahi gham hai raaz-e-nashat-e-dil yahi zindagi ka maza bhi hai

yahi zaKHm-e-dil jo nasib hai yahi soz-e-dil ka naqib hai

ye mere KHulus ka rang hai kisi naznin ki ata bhi hai

hai meri nigah mein sirf tu kisi aur ki nahin justuju

tere iltifat ki aarzu teri be-ruKHi ka gila bhi hai

mujhe kya uDaenge baal-o-par ki qafas mein umr hui basar

main riha hua bhi kabhi agar to rihai meri saza bhi hai

meri dastan bhi ajib hai ye kisi kisi ka nasib hai

kahin zikr-e-baad-e-sumum hai kahin zikr-e-mauj-e-saba bhi hai

na tu uzw-e-jah pe faKHr kar ki ye zindagi to hai ek safar

tujhe kya KHabar are be-KHabar dabe panw pichhe qaza bhi hai

jo bahaar fasl-e-shabab thi wo misal-e-abr guzar gai

nahin zindagi mein koi KHushi ki KHilaf mere hawa bhi hai

wo ba-zoam-e-husn hain KHud-nigar to mujhe bhi naz hai ishq par

main niyaz-mand sahi magar mujhe 'soz' pas-e-ana bhi hai