dar-e-mai-KHana se diwar-e-chaman tak pahunche

dar-e-mai-ḳhāna se dīvār-e-chaman tak pahuñche

ham ġhazāloñ ke ta.āqub meñ ḳhutan tak pahuñche

haath mai-ḳhvāroñ ke be-qasd uThe the lekin

ittifāqan tire gesū kī shikan tak pahuñche

madrase meñ kahāñ us zulf kā mauzū-e-jadīd

log pahuñche to rivāyāt-e-kuhan tak pahuñche

rāsta ek thā ham ishq ke dīvānoñ kā

qad-o-gesū se chale dār-o-rasan tak pahuñche

aa.eñ ham dast-darāzī pe to maiḳhāne se

silsila anjuman-e-sarv-o-saman tak pahuñche

ik qabā-e-subuk-o-tang meñ sau sau haiñ tilism

kyā koī husn ke asrār-e-kuhan tak pahuñche

aap hī aap jo khul jaa.e tirī zulf-e-darāz

nā-gahāñ be-hunarī nuqta-e-fan tak pahuñche

ai suḳhan-fahm ham us bazm se aa.e haiñ jahāñ

hairat ā.īna-e-uslūb-e-suḳhan tak pahuñche

is tarah shauq-e-ġhazālāñ meñ ġhazal-ḳhvāñ ho zafar

shohrat-e-mushk-e-ġhazal shahr-e-ḳhutan tak pahuñche

dar-e-mai-KHana se diwar-e-chaman tak pahunche

hum ghazalon ke taaqub mein KHutan tak pahunche

hath mai-KHwaron ke be-qasd uThe the lekin

ittifaqan tere gesu ki shikan tak pahunche

madrase mein kahan us zulf ka mauzu-e-jadid

log pahunche to riwayat-e-kuhan tak pahunche

rasta ek tha hum ishq ke diwanon ka

qad-o-gesu se chale dar-o-rasan tak pahunche

aaen hum dast-daraazi pe to maiKHane se

silsila anjuman-e-sarw-o-saman tak pahunche

ek qaba-e-subuk-o-tang mein sau sau hain tilism

kya koi husn ke asrar-e-kuhan tak pahunche

aap hi aap jo khul jae teri zulf-e-daraaz

na-gahan be-hunari nuqta-e-fan tak pahunche

ai suKHan-fahm hum us bazm se aae hain jahan

hairat aaina-e-uslub-e-suKHan tak pahunche

is tarah shauq-e-ghazalan mein ghazal-KHwan ho zafar

shohrat-e-mushk-e-ghazal shahr-e-KHutan tak pahunche