در نگار سے جو ہم کنار گزری ہے

در نگار سے جو ہم کنار گزری ہے

وہ شام ہو کہ سحر خوش گوار گزری ہے

خزاں کے ہاتھ سے جو لٹ چکا ہزاروں بار

اسی چمن سے سحر مشک بار گزری ہے

ترے نفس سے جہاں مشک بار گزری ہے

وہیں حیات بڑی خوش گوار گزری ہے

رہ حیات میں ایسے بھی کچھ مقام آئے

تمہاری چشم عنایت بھی بار گزری ہے

جس آن اہل جنوں اپنی آن پر ہیں مٹے

سواد زیست میں وہ یادگار گزری ہے

بھٹکنے والوں کو ملتی نہیں جہاں سے راہ

وہیں سے چشم جنوں بار بار گزری ہے

زبیرؔ ذوق سفر اہل شوق کا ہے جواں

رہ طلب میں قیامت ہزار گزری ہے