dar-e-nigar se jo ham-kanar guzri hai

dar-e-nigār se jo ham-kanār guzrī hai

vo shaam ho ki sahar ḳhush-gavār guzrī hai

ḳhizāñ ke haath se jo luT chukā hazāroñ baar

usī chaman se sahar mushk-bār guzrī hai

tire nafas se jahāñ mushk-bār guzrī hai

vahīñ hayāt baḌī ḳhush-gavār guzrī hai

rah-e-hayāt meñ aise bhī kuchh maqām aa.e

tumhārī chashm-e-ināyat bhī baar guzrī hai

jis aan ahl-e-junūñ apnī aan par haiñ miTe

savād-e-zīst meñ vo yādgār guzrī hai

bhaTakne vāloñ ko miltī nahīñ jahāñ se raah

vahīñ se chashm-e-junūñ baar baar guzrī hai

'zubair' zauq-e-safar ahl-e-shauq kā hai javāñ

rah-e-talab meñ qayāmat hazār guzrī hai

dar-e-nigar se jo ham-kanar guzri hai

wo sham ho ki sahar KHush-gawar guzri hai

KHizan ke hath se jo luT chuka hazaron bar

usi chaman se sahar mushk-bar guzri hai

tere nafas se jahan mushk-bar guzri hai

wahin hayat baDi KHush-gawar guzri hai

rah-e-hayat mein aise bhi kuchh maqam aae

tumhaari chashm-e-inayat bhi bar guzri hai

jis aan ahl-e-junun apni aan par hain miTe

sawad-e-zist mein wo yaadgar guzri hai

bhaTakne walon ko milti nahin jahan se rah

wahin se chashm-e-junun bar bar guzri hai

'zubair' zauq-e-safar ahl-e-shauq ka hai jawan

rah-e-talab mein qayamat hazar guzri hai